《地產經紀生存筆記》作者【R】又一力作！

戳破同業反間‧踢爆賤客陰招

今時今日嘅地產代理市場……

四圍都係同行間諜，今日你可以收到扮客問價嘅電話，聽日人哋仲可以搞垮你單生意……當然反轉亦得。

就連客戶都懂耍手段：扮慘、扮窮、呃樓睇，總之講得出都有。數口精嘅客戶，又會以各種藉口，爭取買賣或租樓時免付佣金，入世未深嘅新手經紀多半上當，為「交數」而做無乜錢落袋嘅生意。

喺阿勞嘅地產經紀生涯入面，曾經歷2008年金融海嘯，當時為咗打發無生意嘅無聊日子而四出報讀課程，其中《易經》最令筆者著迷。某日流連書局，順道閱畢《三十六計》，竟然讀到學過嘅《易經》字句，即時心領神會：其實《三十六計》，咪就係平時見慣見熟嘅賤招？

事實上，每一個計謀，係可以衍生出一系列賤招。本書就係集合同業及客人賤招，整理成36個計謀，仲有埋《易經》嘅原意精髓同埋相關歷史故事畀讀者做參考、反思、改進，用嚟反間一流，更可以用嚟間人（誤），總之見招拆招，亦可防範畀人拆自己招。

希望大家自己生意自己救！